Ravna, Maid dadjet? 2 - Bargobihtát nuppigiela ságastallamiid várás

Dát girji lea Maid dadjet? oahppogirjeráiddu nubbi girji. Ráidui gullet oktiibuot golbma girjji. Girjjit leat oaivvilduvvon doarjjan nuppigiela oahpahusas, ja oahppit besset stohkosiid, spealuid, lávlagiid ja eará doaimmaid bokte ságastallat sámegillii sihke gaskaneaset ja oahpaheaddjiin. Girjjit leat jurddašuvvon olles vuođđoskuvlii ja sihke gáiddusoahpahussii ja lagašoahpahussii. Bargobihtát heivejit buoremusat fágii sámegiella 3, muhto dat sáhttet leat ávkkálaččat maiddái eará sámegiela fágain. Čálli lea iežas oahpahusas vásihan ahte oahppit geat liikojit stoahkat ja speallat, mielas servet girjjiid doaimmaide beroškeahttá agisteaset. Girjji vuosttaš oassi lea čállojuvvon oahpaheaddjiid várás. Dás čilgejuvvo oanehaččat manin ságastallan lea beaktilis vuohki oahppat nuppigiela, ja mo oahpaheaddji sáhttá geavahit girjji. Árvidanstoagus krokodiilatráhppa geavahuvvo dás ovdamearkan. Maid dadjet?-girjeráiddu didaktihkka čilgejuvvo vuđolabbot ovttešgirjjis. Čálli ovdanbuktá dás oahpahanmodealla sámástangoahti ja čatná dan doahpagiid ságastallandoibmii stállosárgun. Nu boahtá ovdan mo oahpaheaddji sáhttá lágidit oahppoaktiviteahtaid nu ahte oahppiid dáhttu ja vejolašvuohta oassálastit sámegiel ságastallamiidda lassánit. Ellen Ravna/ Uvllá Elle lea oahpaheaddji Sámi joatkkaskuvllas Kárášjogas. Son lea guhká oahpahan sámegiela sihke gáiddusoahpahusas ja lagašoahpahusas, ja son gárvvistii masterdutkamuša nuppigiela didaktihkas Sámi allaskuvllas jagi 2019. Maid dadjet?-girjjit leat čállojuvvon masterbarggu fuomášumiid vuođul.